Landbúnaðarsafn Íslands er byggt á grunni Búvélasafnsins sem starfað hafði á Hvanneyri um langt árabil. Búvélasafnið var fyrst opnað almenningi sumarið 1987. Þá höfðu starfsmenn Bútæknideildar Rannsóknastofnunar landbúnaðarins gert upp nokkrar vélar og útbúin hafði verið dálítil geymslu- og sýningaraðstaða, sem síðan hefur verið aukin og bætt.
Sýning safnsins er i Verkfærahúsinu á Hvanneyri, sem lengi hýsti búvélaprófanir Verkfæranefndar og síðar Bútæknideildar Rala, svo og vélfræðikennslustofu Bændaskólans og fleira.
Síðustu 14 árin hefur safnið verið opið um ársins hring, og er á móti gestum tekið eftir þörfum og pöntun. Sumarmánuðina júní-ágúst hefur safnið verið opið daglega. Gestafjöldi á hverju ári hefur verið um fimm þúsund manns.