Söfn, sýningar, setur og gestastofur
Á Vesturlandi eru alls 19 söfn, sýningar, setur eða gestastofur hvert með sínu sérsviði þannig að úr nógu er að velja.
Reykholt er fornt menningarsetur þar sem Snorri Sturluson bjó á árunum 1206 -1241. Þar er Snorrastofa sem leggur áherslu á að varðveita og kynna merka sögu staðarins með sýningum, öflugu bókasafni , gestastsofu og á ýmsan annan máta.
Gljúfrasteinn var heimili og vinnustaður nóbelsskáldsins Halldórs Laxness en er nú safn sem gaman er að heimsækja.
Margir staðir leggja áherslu á móttöku yngri kynslóðarinnar samanber fyrirtækin sem kynna Sögu og Jökul og sagt er frá hér á heimasíðunni undir hnappnum
Upplifðu Vesturland - Saga og Jökull.
Að Fossatúni í Borgarfirði er Tröllagarður þar sem hægt er að kynnast ýmsum persónum úr sögunni Tryggðatröll eftir Steinar Berg sem gerist í Borgarfirði. Þar er einnig hægt að losa sig við allar heimsins áhyggjur á steini einum.
Sögumiðstöðin í Grundarfirði kynnir okkur hvernig nútíminn varð til. Safnasvæðið á Akranesi, þar sem Kúter Sigurfari er í hlaðinu hýsir mörg söfn til dæmis sérstakt steinasafn og Íþróttasafn Íslands.
Nýjustu söfnin eru hið einstaka Eldfjallasafn í Stykkishólmi sem opnaði sumarið 2009 og Brúðuheimar í Borgarnesi sem tók til starfa vorið 2010, þar er safn, sýningar og námskeið allt tengt brúðuleiklist.
Fjölmargir aðrir staðir kynna sögu og menningu svæðisins og landsins alls svo sem Landnámssetur Íslands í Borgarnesi leggur áherslu á að kynna Egilssögu og Landnámssöguna og að Eiríksstöðum í Haukadal er lifandi sögusýning. Athyglisvert veiðisafn er á Ferjubakka í Borgarfirði.
Ekki er hægt að gera öllum skil hér en listi yfir þau er neðar á síðunni.