Akranes í dag
Akranes er stærsta bæjarfélagið á Vesturlandi þar sem búa um 6550 manns. Það tekur einungis um 40 mín að keyra frá Reykjavík upp á Akranes ef farið er um Hvalfjarðargöng. Daglegar strætisvagnaferðir eru á milli Reykjavíkur og Akraness. Strandlengjan meðfram Akranesi er sérlega fjölbreytt og skemmtileg.
Langisandur með sinn ljósa sand þar sem hægt er að byggja sandkastala af öllum stærðum og gerðum er eitt vinsælasta útivistasvæðið á Akranesi. Ysti tanginn á Skaganum nefnist Breið og þar er að finna tvo vita og mjög fallegt útsýni.
Á Safnasvæðinu að Görðum er hægt að sjá fjölda báta, gömul hús með sál, einstakt steinasafn og Íþróttasafn Íslands sem sómir sér vel í íþróttabænum Akranesi.
Garðalundur er í næsta nágrenni við Safnasvæðið og þar er einnig mjög góður 18 holu golfvöllur. Á Akranesi er einnig að finna farfuglaheimili, heimagistingu, tjaldsvæði,veitinga- og kaffihús, söfn, gönguleiðir og sundlaug.