Egill var mikið skáld en líka víkingur og ribbaldi í útlöndum
Reykholt í Borgarfirði er einn merkasti sögustaður landsins, ekki síst vegna þeirra menningarminja, sem tengjast búsetu Snorra Sturlusonar á árunum 1206-1241. Þar eru afar merkar fornminjar frá tímum Snorra svo sem laug, göng, bæjarrústir og heitavatns- og gufustokkar.
Snorrstofa í Reykholti Menningar- og miðaldasetur, sem komið hefur verið á fót til minningar um Snorra Sturluson. Stofnuninni er ætlað að sinna og stuðla að rannsóknum og kynningu á miðaldafræðum og sögu Reykholts og Borgarfjarðar sérstaklega. Á vegum Snorrastofu eru haldin námskeið, ráðstefnur og fundir og settar upp sýningar er tengjast þessum viðfangsefnum. Þar er seldur aðgangur að sýningum, rekin minjagripaverslun og veitt ýmis þjónusta við ferðamenn.
Landnámssetur Íslands í Borgarnesi kynnir Egilssögu og Landnámu á skemmtilegan og einfaldna máta með því að gesturinn er leiddur í gegnum nokkurs konar völundarhús inn í ævintýraheim sagnanna með hljóðleiðsögn sem fáanleg er á níu tungumálum auk íslensku og sérstakrar barnarásar. Ferðin gegnum hvora sýniggu tekur um 30 mínútur.
Egilssýningin segir frá einum litríkasta persónuleika Íslendingasagnanna, Agli Skalla-Grímssyni. Faðir Egils, Skalla-Grímur Kveld-Úlfsson, var einn af fyrstu landnámsmönnunum og kom til Íslands um 10 árum á eftir Ingólfi Arnarsyni. Í sögunni um Egil er því best og nákvæmast lýst hvernig ein ætt sest að á Íslandi. Egill var mikið skáld en líka víkingur og ribbaldi í útlöndum. Inn í söguna tvinnast bardagar og ástir, galdur og forneskja.
Í landnámssýningunni er sagt frá mönnunum sem fyrstir stigu á land og hvernig Ísland var numið, fram til stofnunar Alþingis á Þingvöllum árið 930. Sýningu greinir frá því hvernig norrænir menn fóru að því að rata yfir opið haf, af hverju þeir yfirgáfu heimkynni sín og hvað beið fyrstu landnámsmannanna. Með nútíma tækni sjónvarps og leikhús er leitast við að gesturinn fái tilfinningu fyrir því hvernig það var að ganga á áður ónumið land.
Að Eiríksstöðum í Haukadal er lifandi sögusýning og tilgátuhús sem byggt er á gömlum rústum. Gamlar íslenskar sagnir herma að Eiríkur rauði hafi búið að Eiríksstöðum í Haukadal. Þar mun hann hafa gengið að eiga Þjóðhildi dóttir Jörundar bónda að Vatni. Eiríkur þótti illur viðureignar og var gerður brottrækur úr Haukadal eftir að hann gerðist sekur af vígaferlum.
Eiríkur rauði nam fyrstur manna land á Grænlandi eftir að hafa verið gerður útlægur frá Íslandi og Leifur heppni, sonur hans, sem fæddist að öllum líkindum á Eiríksstöðum, varð fyrstur Evrópumanna til að kanna Nýja heiminn eða þau lönd er við í dag köllum Ameríku.
Sagan lifnar við á Eiríksstöðum því leiðsögumenn klæddir að fornum sið fræða gesti um söguna, sýna fornt handverk og muni. Góð aðstaða er fyrir ferðamenn, salerni og aðgengi fyrir fatlaða að rústinni. Minjagripa og kaffisala í þjónustuhúsi er á staðnum.
Á síðustu árum hefur sagnalistin verið endurvakin og hafa einleikssýningarnar um Egils Skallagrímsson og Brák sem fluttar voru á Sagnaloftinu í Landnámssetrinu haft mikil áhrif. Sumarið 2010 er sýning í gömlu Reykholtskirkju á einleik um Hallveigu Ormsdóttur seinni konu og uppáhaldsfrillu Snorra Sturlusonar.
Eyrbyggja – Sögumiðstöð í Grundarfirði hefur tekið þátt í ýmsum verkefnum er tengjast sagnalist. Einstaklingar á hennar vegum, Ingi Hans og Sigurborg hafa haldið sagnanámskeið, sem felast í megindráttum í endurvinnslu þjóðsagna og endurreisn sagnahefðar. Ingi Hans og Sigurborg hafa hvatt til stofnunar sagnahópa víða um land og skapað tengsl við önnur lönd á þessu sviði.